Pas blerjes së mijëra dronëve lufarakë kamikazë Skydager nga ana e Kosovës, ka reaguar NATO që ka theksuar se çdo aktivitet në hapësirën ajrore të territorit Kosovar duhet të kryet në bashkëpunim me misionin paqeruajtës të KFOR, kjo për të parandaluar tensionet dhe për të garantuar siguri. Në një reagim të dhënë për Radio Evropa e Lirë, zyrtari I NATO-s e vlerësoi Turqinë si kontribuuese në misionin e udhëhequr nga ajo në Kosovë, KFOR, dhe në stabilitetin rajonal. Por, ai nuk pranoi t’i përgjigjej pyetjes së REL-it se në çfarë rrethanash Kosovës mund t'i lejohet që t’i përdorë këta dronë, duke ditur se vetëm misioni i udhëhequr nga NATO-ja e ka autoritetin mbi hapësirën ajrore të saj. “KFOR-i e mbikëqyr rregullisht hapësirën ajrore të Kosovës, duke i përdorur të gjitha mjetet dhe burimet që ka në dispozicion, në përputhje me autoritetin dhe mandatin e saj ekzistues, sipas Rezolutës 1244 të Këshillit të Sigurimit të OKB-së të vitit 1999”, tha zyrtari i NATO-s ndërsa theksoi se KFOR-i mbetet i përfshirë “ngushtë në këtë çështje të rëndësishme dhe është në kontakt të ngushtë me organizatat e sigurisë së Kosovës dhe me forcat e armatosura të Serbisë për këtë qëllim”.