Ministri në detyrë i Punëve të Brendshme të Kosovës, Xhelal Sveçla ka njoftuar nisjen e hapave të parë drejt themelimit të Xhandarmërisë. Përmes një postimi në rrjetet sociale, Sveçla bën me dije se ka nënshkruar themelimin e grupit punues, që sipas tij, do të bëjë analizimin dhe propozimin e modaliteteteve për funksionimin e Xhandarmërisë, si Agjencion i Ministrisë së Punëve të Brendshme. Ministri në detyrë shkruan se Xhandarmëria përfaqëson një hap të rëndësishëm në konsolidimin e sigurisë, për të garantuar ruajtjen e kufinjve, integritetit dhe sovranitetit territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike. Sipas tij, Xhandarmëria do të forcojë ndjeshëm kapacitetin shtetëror për parandalim, menaxhim dhe neutralizim të kërcënimeve që cënojnë sigurinë e qytetarëve dhe integritetin territorial të vendit. Në lidhje me këtë vendim, ka reaguar edhe Serbia, duke thënë se qeveria Kurti nuk ka bazë e as hapësirë për të formuar ndonjë njësit paramilitar apo parapolicor jashtë marrëveshjeve ekzistuese, aq më pak t’i disolokojë në zonat në veri të Kosovës. Ekspertët e sigurisë e kanë konsideruar themelimin e Xhandarmërisë si vendim strategjik për ruajtjen e kufirit me Serbinë. Xhandarmëria është një forcë e sigurisë me karakter ushtarak që kryen detyra policore. Në disa shtete mund të jetë pjesë e Ministrisë së Brendshme, në të tjera pjesë e forcave të armatosura.