Davide Pecoreli, italiani që u raportua se u vra në Pukë e më pas u shfaq i gjallë në Itali pas 8 muajsh, është arrestuar këtë të shtunë në Itali, me qëllim ekstradimin në Shqipëri. 47-vjeçari ishte i shpallur në kërkim ndërkombëtar, pasi Gjykata e Rrethit Gjyqësor Pukë, ka caktuar ndaj tij, masën e sigurisë “Arrest në burg”, për veprat penale: “Mashtrimi", "Dhunimi i varreve", "Veprime që pengojnë zbulimin e së vërtetës", "Shkatërrimi i pronës me zjarr" dhe "Kalimi i paligjshëm i kufirit shtetëror". Në janar të vitit 2021 Pecorelli, për t’i shpëtuar borxheve financiare në Itali, i vuri flakën një makine të marrë me qira në fshatin Rras të Shqipërisë, dhe inskenoi vdekjen e tij me anë të mbetjeve të eshtrave që i siguroi nga dhunimi I varreve. Davide Pecoreli u gjet i gjallë më 17 shtator 2021 në ishullin e Montecristos në Itali. Kapja e 47-vjeçarit u realizua në kuadër të operacionit policor të koduar ‘Perugia’, falë bashkëpunimit policor shqiptar me atë italian me qëllim lokalizimin dhe kapjen e shtetasve të shpallur në kërkim ndërkombëtar.