Një ngjarje e rëndë është regjistruar mbrëmjen e së enjtes në Selanik, ku një i ri 19-vjeçar nga Shqipëria ka humbur jetën pas ka rënë nga ballkoni i një apartamenti në katin e katërt. Ngjarja ndodhi rreth orës 22:00, në një zonë të frekuentuar të qytetit grek. Sipas informacionit të policisë, i riu i cili ishte vendosur në një apartament me qira afatshkurtër, ka rënë nga ballkoni i tij. Mediat greke raportojnë se pavarësisht se ambulanca mbërriti shpejt në vendngjarje, mjekët nuk mundën t'i shpëtojnë jetën të riut, i cili kishte ndërruar jetë në vend. Pas ngjarjes së rëndë është ngritur një grup hetimor që po kryen të gjitha veprimet e nevojshme për të bërë të mundur zbardhjen e plotë të dinamikës së vdekjes së shqiptarit. Autoritetet kanë deklaruar se hetimet janë në fazat e para dhe se do të merren në konsideratë të gjitha pistat përfshirë vrasjen, vetëvrasjen apo rënien aksidentale.