Tregu i punës në Shqipëri paraqet problematika në lidhje me shkallën e informalitetit. Organizata Ndërkombëtare e Punësimit ka publikuar një raport sipas të cilit më shumë se gjysma e qytetarëve shqiptarë nuk paguajnë sigurime shoqërore dhe shëndetësore. Pandemia gjithashtu ka pasur impaktin e saj në rritjen e informalitetit, thuhet në raport. Konkretisht 56.7 për qind e të punësuarve nuk paguajnë sigurime duke bërë që ekonomia informale të dominojë tregun shqiptar. 73 përqind e tyre punojnë në biznese, të cilët gjithashtu nuk janë të formalizuar në tatime, ndërkohë që 26 përqind punojnë në aktivitete shtëpiake si të vetëpunësuar. Tregun e informalitetit e dominojnë meshkujt dhe individët me arsim të mesëm. Sektori i tregtisë dhe ndërtimit paraqet nivel të lartë mosdeklarimi të sigurimeve shoqërore dhe shëndetësore. Fakti që më shumë se gjysma e të punësuarve shqiptarë nuk figurojnë në regjistrat e Institutit të Sigurimeve Shoqërore, ka sjellë si pasojë një deformim të sistemit fiskal në vend. Janë me shume se 650 mijë pensionistë në vend, të cilët kërkojnë një fond total prej 700 milionë eurosh për të përfituar pensionet. Pengesat në skemën e kontributeve të sigurimeve shoqërore sjellin të ardhura të pakta dhe për pasojë pensione të ulta për përfituesit e pensioneve.