Gjashtë mujori i parë i 2023 parashikohet të jetë favorit për monedhën europiane. Sinjalet e para janë dhënë që në ditët e para të vitit, ku të dhënat e Bankës së Shqipërisë tregojnë një rimëkëmbje të euros kundrejt lekut. Një euro këmbehet me 117.46 lekë, çka tregon forcim të konsiderueshëm krahasuar me fundin e muajit dhjetor, kur monedha europiane preku minimumin e 112.4 lekë. Sipas ekspertëve të tregut valutor, shkak për dobësimin e euros në festat e fundvitit, u bë kthimi i emigrantëve në Shqipëri, çka rriti ofertën e euros në treg. Megjithatë, viti elektoral pritet të ketë efekt edhe në kursin e këmbimit. Në buxhetin e vitit 2023 është parashikuar që shpenzimet publike këtë vit të rriten në 61 bashkitë e vendit, gjë që rrit ofertën e lekut në tregun valutor dhe e zhvlerëson atë krahas monedhave të huaja. Por, precedentët e viteve të mëparshme elektorale tregojnë për flukse valutore nga burime informale gjatë periudhave parazgjedhore, që përkthehet në rritje të ofertës së euros. Ndaj pritshmëritë janë që të amortizohet ndikimi në kursin e këmbimit.