Dy autorët e dyshuar për vrasjen e një shtetasi në Gjilan më datë 7 nëntor janë vetëdorëzuar në policinë e Kosovës. Me qëllim për zbardhjen e plotë të rastit të vrasjes, janë mbledhur dhe analizuar prova ligjore, dhjetëra materiale filmike të kamerave të sigurisë, intervista, si dhe janë zhvilluar kontrolle të vazhdueshme të disa ambjenteve për të cilat paraprakisht siguroheshin informacione se janë duke u shfrytëzuar për strehim dhe fshehje nga ana e të dyshuarave. Dy të dyshuarit dyshohet se kanë qenë të përfshirë në vrasjen e ndodhur me datën 07 nëntor të këtij viti në rrugën ‘’Mërgimtarët e Gjilanit’’ ku mbeti i vrarë me armë zjarri shtetasi me iniciale S.O. Sipas policisë nga të dyshuarit është konfiskuar një armë zjarri pistoletë e kalibrit 9mm me të cilin dyshohet se është kryer vrasja. Të dyshuarit kanë dhënë dëshminë e tyre në prezencën e avokatëve mbrojtës, ndërkohë që për momentin janë ndaluar në qendrën e mbajtjes për 48 orë. Ky rast ka kaluar në ngarkim të Prokurorisë Themelore.