Policia ka ndaluar dy persona në Fushë Kosovë të cilët dyshohen për dhënie dhe marrje ryshferi në lidhje me procesin e votimit përgjatë kësaj të diele. Prokuroria Themelore në Prishtinë, njoftoi opinionin publik se në komunën e Fushë Kosovës, me vendim të Prokurorit të shtetit, janë ndaluar dy persona, për shkak të dyshimit të veprës penale ‘’Dhënia dhe marrja e ryshfetit në lidhje me votimin’’ nga neni 212 të Kodit Penal të Republikës së Kosovës. Gjatë operacionit për ndalimin e këtyre dy shtetasve, u sekuestrua një telefon, i cili do të shërbejë si provë materiale në procedat e mëtejshme hetimore, për të parë në rast se do gjenden komunikime mes të ndaluarve me persona të tjerë për dhënie apo marrje ryshfeti. Prokuroria Themelore në Prishtinë tha se do të ndërmarrë të gjitha masat dhe veprimet e nevojshme konform dispozitave ligjore për zbardhjen e plotë të rastit. Policia e Kosovës në bashkëpunim me rreth 80 prokurorë kanë qenë përgjatë kësaj të diele të pranishëm në të 18 komunuta ku u zhvillua procesi zgjedhor, për identifikimin e incidenteve të mundshme apo të shitblerjes së votës.