Presidenti i Republika Srpska Milorad Dodik kërcënoi se do tërheqë mbështetjen për rrugën evropiane të Bosnjë-Hercegovinës. Në një dalje para gazetarëve, Dodik tha se beson se do të ketë një aleat të fortë në kryeministrin hungarez Viktor Orban në të ardhmen dhe shpreson që presidenti i ri i SHBA-së, Donald Trump, të heqë sanksionet. Udhëheqësi serb i Bosnjës, Dodik akuzoi Bashkimin Evropian se po drejton një politikë “të poshtër”, sepse kushtëzon mbështetjen financiare për vendet që duan të bëhen anëtarë të tij me zbatimin e reformave. Sipas tij BE, po e bën këtë vetëm në lidhje me BiH, në mënyrë që Republika Srpska “të humbasë karakterin e saj”. Ai u shpreh se tani nuk ka asnjë arsye për të përmbushur kërkesat që vijnë nga Brukseli, duke iu referuar reformave që duhen zbatuar me qëllim aksesin e fondit prej gjashtë miliardë eurosh, të siguruar përmes planit të rritjes për Ballkanin Perëndimor. Dodik tha se Bashkimi Evropian nuk është destinacioni i vetëm me aludimin për BRICS, një organizatë ndërqeveritare që kryesohet nga Rusia. Ai është nën sanksione të SHBA-së, ka kohë që kërcënon me ndarje të Republikës Srpska, lëvizje të cilat janë kundër Marrëveshjes së Dejtonit.