Diskutimet në Parlament dhe Komisionet Parlamentare të buxhetit të ri 2025, duket se ishin shkaku kryesor i rikthimit të opozitës në Kuvend, duke ‘lënë mënjanë’ mosbindjen civile dhe kaosin. Në të tillë situatë Partia Demokratike ka paralajmëruar një betejë të ashpër për buxhetin e ri, ndonëse sipas tyre nuk kanë vota për ta penguar, por që do të tregojnë para shqiptarëve atë që sipas tyre tregon ky buxhet, të cilin e konsiderojnë buxhetin e vjedhjeve dhe oligarkëve. Por krahas debatit demokratët kanë paralajmëruar se do të depozitojnë edhe propozimet e tyre. Amendamenti i parë i depozituar është ai i deputetes Zheni Gjergji për të mbështetur gratë që vuajnë nga kanceri i gjirit. Ky amendament parashikon që 600 milionë lekë të përdoren “per rimbursimin e shpenzimeve per protezat e rikonstruksionit te gjirit dhe paruket per grate e diagnostikuara dhe ne trajtimit mjeksore ndaj kancerit te gjirit.” Po ashtu në amendament kërkohet “"çelet nje fond i posaçem per blerjen e nje pajisje PET Skaner dhe dy pajisje akseleratore ne Qendren Spitalore Universitare Nene Tereza, Tirane. Fondi i posaçem parashikon te perfshije edhe shpenzimet per mirembatjen ne per qellim funksionimin e panderprere pajisjeve.” Ky amendament mban firmën e 9 deputeteve demokrat. Ndërkohë poashtu demokratët kanë paralajmëruar një amendament për pensionet, por edhe vendosjen e minimumit jetik prej 200 eurosh, si dhe një projektligj për minatorët, të cilët vijojnë të kërkojnë statusin e tyre dhe përkrahje nga shteti.