Raporti i fundit i Amnesty International për të drejtat e njeriut e rendit Kosovën mes vendeve me sfida të vazhdueshme, duke evidentuar si shqetësime kryesore dhunën me bazë gjinore, sulmet ndaj gazetarëve, gjuhën raciste dhe mungesën e një ligji për bashkësitë civile mes personave të së njëjtës gjini. Sipas raportit, dhuna në familje mbetet në nivele të larta, ndërsa përpjekjet institucionale për mbrojtjen e grave konsiderohen të pamjaftueshme. Që nga viti 2010, rreth 60 gra janë vrarë në Kosovë, ndërkohë që autoritetet shpesh janë kritikuar për dështim në parandalimin e rasteve fatale. Raporti ngre shqetësim edhe për kufizimin e të drejtave, si në rastin e vendimit për ndalimin e shamisë në shkolla, që sipas organizatës cenon qasjen e vajzave në arsim. Ndërkohë, gjatë vitit 2025 janë raportuar dhjetëra raste kërcënimesh dhe sulmesh ndaj gazetarëve. Raporti trajton edhe çështjet e drejtësisë për krimet e luftës, ku përmenden dënimet për raste të përdhunimeve gjatë konfliktit, si dhe fakti që rreth 1.600 persona vijojnë të jenë ende të zhdukur.