Ambasada e SHBA-së në Kosovë ka reguar pas shkarkimit të Bordit të RTK-së, duke thënë se shkarkimet e njëanshme, të nxituara dëmtojnë institucionet publike. Madje në reagimin e amabasadës thuhet se shkarkimi i këtij bordi u bë me justifikim të pamjaftueshëm. “Dje, Kuvendi shkarkoi anëtarët e një bordi tjetër mbikëqyrës publik me një justifikim të pamjaftueshëm. Shkarkimet duhet të bazohen në prova transparente ashtu si emërimet që duhet të bazohen në merita. Shkarkimet e njëanshme të nxituara dëmtojnë institucionet publike dhe nuk adresojnë problemet strukturore. Reformat efektive afatgjata kërkojnë një qasje të qëllimshme, metodike duke vënë interesat e Kosovës në radhë të parë dhe politikat partiake mënjanë”, thuhet në reagimin e ambasadës amerikane. Kuvendi i Kosovës të enjten ka shkarkuar bordin e RTK-së. Së pari është shkarkuar anëtari i bordit Sali Bashota me 64 vota për dhe pas tij është shkarkuar Agron Gashi, Lirim Geci, Ilir Bytyqi, Albinot Maloku, Bajram Mjeku, Petrit Musolli dhe Fadil Miftari.