Për herë të parë Tirana priti botërorin e mundjes për moshën 23-vjeç dhe të rritur, në peshat jo olimpike. Pjesë e kësaj gare sportive u bën 2300 sportistë nga 80 shtete të botës. Garat u zhvilluan në sallën sportive “Feti Borova” në Parkun Olimpik në Tiranë, ndërsa kryebashkiaku Erion Veliaj vlerësoi organizimin e këtij aktiviteti. “Ishte një kënaqësi e jashtëzakonshme që kemi pritur në Tiranë dhjetëra shtete, nga të gjithë cepat e botës, dhe pavarësisht se politika ka bindje të ndryshme, ca janë majtas, ca janë djathtas, ca janë në veri, ca janë në jug, ca janë në Azi, ca janë në Amerikë, rëndësi ka që sporti na bën të gjithëve bashkë. Ndaj, dua ta falenderoj me gjithë zemër Sahit Prizrenin dhe skuadrën tonë të Federatës së Mundjes, për një organizim të jashtëzakonshëm” Ai tha se rezultatet e arritura në Olimpiadën e Parisit janë vetëm fillimi i një historie ku rinia merret me sport.