Kuvendi i Kosovës i dha dritën jeshile dërgimit të FSK në Gaza. Deputetët miratuan këtë të premte propozimin e qeverisë në kuadër të bordit të Paqes të Trump. Propozimi mori 89 vota pro ndërsa tani është radha e presidentes për të nënshkruar vendimin. Detyrë që mbahet përkohësisht nga kryetarja e Parlamentit Albiena Haxhiu. Ministri i Mbrojtjes, Ejup Maqedonci, tha se ky vendim forcon edhe më tej profilin ndërkombëtar të Kosovës, afirmon profesionalizmin e FSK-së dhe vendosë vendin në mesin e shteteve, që jo vetëm që përfitojnë nga siguria ndërkombëtare, por edhe kontribuojnë në ruajtjen e paqes dhe rendit ndërkombëtar. “Përmes këtij angazhimi, Kosova dëshmon që është partner i besueshëm, i përgjegjshëm dhe i gatshëm të veprojë krah aleatëve në mbështetje të paqes, sigurisë, mbrojtjes ë civileve dhe mandateve ndërkombëtare”, tha ministri Maqedonci. Dërgimi i trupave të FSK-së parashikohet të bëhet në kuadër të Forcës Ndërkombëtare Stabilizuese (FNS), një mekanizëm i krijuar si pjesë e nismës së ashtuquajtur Bordi i Paqes, i propozuar nga presidenti amerikan, Donald Trump, për arritjen e paqes në botë. Kosova është në mesin e pesë shteteve të para – së bashku me Shqipërinë, Indonezinë, Marokun, dhe Kazakistanin– që janë zotuar për angazhim në këtë mision, me qëllim ofrimin e sigurisë dhe mbikëqyrjen e armëpushimit në Rripin e Gazës.