Kosova po vazhdon procesin e ndërtimit të kapaciteteve të saj ushtarake, paralelisht me përpjekjet për njohje të plotë ndërkombëtare, shkruan Bloomberg. Sipas artikullit, Kosova ka investuar rreth 1 miliard dollarë në krijimin e ushtrisë së saj, ndërsa deri tani ka siguruar sisteme armatimi në vlerë prej rreth 460 milionë eurosh. Ministri në detyrë i Mbrojtjes, Ejup Maqedonci, I ka cilësuar këto investime si “hapa shumë të mëdhenj” drejt krijimit të një force të gatshme për mbrojtjen e vendit dhe bashkëpunim me partnerët ndërkombëtarë. Ai thotë me tej për Bloomberg, se synimi është që Forca e Sigurisë së Kosovës të ketë 5 mijë ushtarë aktivë dhe një sistem rezervistësh mbi baza vullnetare. Sipas ministrit, ushtria planifikon të zhvillojë kapacitete të mbrojtjes ajrore, artileri dhe helikopterë ushtarakë. Artikulli thekson se transformimi i FSK-së, në ushtri ka nisur prej 8 vitesh, me mbështetjen e SHBA, Gjermanisë, Mretërisë së Bashkuar dhe Francës. Bloomberg shkruan se Kosova posedon disa lloje dronësh dhe sisteme kundërtanke, ndërsa thekson se ka nënshkruar marrëveshje bilaterale ushtarake me shtete anëtare të NATO-s, kryesisht me SHBA-në dhe Turqia, për avancimin e kapaciteteve mbrojtëse.