Ndërkombëtarët vijojnë të këmbëngulin ndaj qeverisë kosovare të Albin Kurtit, që të mos marrë masa që sipas tyre janë të pakoordinuara me ta, dhe që mund të cënojnë sigurinë në veriun e Kosovës. Për këtë, zëdhënësi I Bashkimit Europian, Peter Stano ka dalë në një tjetër konferencë, ku kërkon zgjidhje të dialoguar, edhe për hapjen e urës së Ibrit që lidh Mitrovicën e veriut me atë të jugut. “Urat zakonisht i bashkojnë njerëzit. Fatkeqësisht, situata që kemi në veri të Kosovës është rezultat i një numri të madh rrethanash të vështira politike. Prandaj ne vazhdimisht kemi thënë se është një çështje shpërthyese, një çështje problematike, dhe si të gjitha çështjet problematike, duhet të zgjidhet me dialog, sepse nëse keni një problem, atëherë e zgjidhni me dialog, jo me vendime të njëanshme”, tha Stano. Zëdhënësi I Be u ndal edhe tek qëndrimi i vendeve të QUINT, duke thënë se ambasadorët e tyre i kanë thënë kryeministrit Albin Kurti, të mos bëjë lëvizje të njëanshme dhe të mos e hapë urën, por mesa duket ai është i vendosur për ta bërë këtë. “Prandaj thamë “jo, do të ketë efekte shumë negative të BE-së dhe sipas disa masave të SHBA-së për shkak të tërheqjes së përsëritur dhe të provuar të lëvizjeve që çojnë në përshkallëzim”, tha Stano.