Komisioni Evropian ka nisur transferimin e 61.8 milionë eurove Kosovës si paradhënie në kuadër të Mekanizmit për Reforma dhe Rritje të Planit të Rritjes, pasi vendi ka dorëzuar dokumentet e nevojshme në KE dhe ka ratifikuar marrëveshjet e lidhura me këtë plan. Kosova është shteti i fundit në rajon që pranon këto mjete për shkak të mungesës së institucioneve vitin e kaluar nga bllokada politike. “Plani për Rritje Ekonomike ofron mundësi konkrete për përshpejtim të reformave të lidhura me BE-në dhe për afrim më të madh të ekonomisë së Kosovës me tregun e përbashkët të BE-së”, ka bërë me dije shefja në detyrë e BE në Kosovë Eva Palatova. Zyrtarja tha se BE përmes kësaj përkrahje synon të ndihmojë Kosovën të forcojë sundimin e ligjit, të avancojë në tranzicionin e gjelbër dhe atij digjital, si dhe të nxisë rritjen e qëndrueshme ekonomike. Sakaq, kryeministri i Kosovës, Albin Kurti, deklaroi se vendi është i përkushtuar për zbatimin e zotimeve brenda afateve të Agjendës së Reformave në mënyrë që të shfrytëzojë mundësitë e ofruara nga plani i rritjes. BE-ja ka bërë me dije se parafinancimi prej 61.8 milionë eurosh, është vetëm 7 për qind e totalit prej 882.6 milionë eurosh grante dhe kredi me kushte të favorshme për Kosovën në kuadër të Planit për Rritje Ekonomike.