Të gjitha provat dhe lëvizjet e autorëve të sulmit terrorist ndaj Top Channel të ndodhur në minutat e para të së hënës tregojnë se bëhet fjalë për një atentat të mirëmenduar, që është përgatur prej muajsh dhe në kuadër të një grupi kriminal. Përdorimi i një makine të shtrenjtë e të vjedhur gati tre vite më parë, vjedhja e targave natën e vitit të ri dhe mënyra se si kanë lëvizur autorët tregojnë për një atentat që ka marrë kohë dhe mbi të gjitha kosto financiare që vetëm në kuadër të një grupi të strukturuar kriminal mund të mbulohen. Sipas legjislacionit në fuqi, grupet e organizuara të krimit hetohen nga prokurorët e posaçëm. Kjo do të thotë se në bazë të këtyre indicieve dhe provave, hetimet për sulmin terrorist ndaj Top Channel duhet të kalojnë në SPAK.