Fushata elektorale e këtij viti, vijon të prodhojë debat dhe të jetë tema që dominon përditshmërinë tonë. Përpos takimeve elektorale me akuza të ndërsjellta nga të dyja kampet politike, një tjetër çështje ka tërhequr vëmendjen dhe ka shkaktuar reagime të shumta, si në rrjetet sociale ashtu edhe në qëndrimet publike. Bëhet fjalë për spotet elektorale të partive kryesore politike, ku protagonistë janë disa nga aktorët më të njohur dhe më të dashur për publikun. Në, një prej ketyre spoteve që u publikua me nisjen e fushatës zgjedhore të PS, ishte zgjedhur Robert Ndrenika, si përcjellës i mesazhit për zgjedhësit shqiptarë dhe pse kjo maxhorancë duhet të vazhdojë të qeverisë vendin. “Teatri ishte një vend që gjallëronte. Teatri ishte pasioni ynë. Teatri ishte shtëpia ime, shtëpia juaj dhe e të gjithë familjeve tona. Por tani boshatisja e tij tregon vuajtjet tona, në këtë kohë që shfaqjet janë ndaluar. E di, e di që këtu do shohim përsëri shfaqje, jo vetëm këtu, por edhe në Teatrin e ri Kombëtar. Aty ku ishte, por shumë herë më funksional dhe më i bukur nga sa ishte”, thuhet ndër të tjera në spotin e PS të përcjellë me zërin e Ndrenikës, duke prekur mes të tjerash edhe një nga çështjet më të nxehta që ndau më dysh komunitetin e artistëve, shembjen e godinës së Teatrit Kombëtar rreth një vit më parë. Në një tjetër spot të publikuar së fundmi nga PS, në të njëjtën linjë me Ndrenikën shfaqet edhe aktorja e njohur e skenës dhe ekranit Tinka Kurti, duke u shfaqur si mbështetëse e partisë në pushtet. Ndërsa PD ka zgjedhur të ketë pjesë të spotit të saj elektoral aktorin Neritan Liçaj, ku ai është ndër personazhet që mbajnë në duar yjet që simbolizojnë shtetet anëtare të BE, duke theksuar çwshtjen e integrimit, njw nga synimet e papërmbushura të Shqipërisë në vitet e demokracisë.