Prokuroria e Posaçme ka mbyllur hetimet dhe ka dërguar për gjykim dosjen në ngarkim të nëntë anëtarëve të grupit të Laert Haxhiut. Dosja në ngarkim të Lulzim Spahijat, Artan Tafanit, Ligor Romackës, Bledar Berberit, Erisiano dhe Bujar Abdeinit, Mariglen Topuzit, Idriz Manejt dhe Enriko Xhahysës ka kaluar me akuzat e kryerjes së veprave penale në kuadër të grupit të strukturuar kriminal, që drejtohej nga Laert Haxhiu. Nëntë të pandehurit akuzohen për katër vrasje, dy të ndodhura në Peqin, një në Tepelenë dhe një në Korçë përgjatë vitit 2021. Tre prej vrasjeve, sipas njoftimit të SPAK janë vrasje me pagesë, ndërsa një e ndodhur në fshatin Gjoçaj të Peqinit ka për motiv gjakmarrjen. Grupi akuzohet edhe për shkatërrim prone me eksploziv, përfshirë këtu edhe një rast të vendosjes së tritolit në lokalin e Rigels Rajkut, njohur me emrin Noizy dhe grabitje automjetesh.