Pasiguria politike dhe juridike për gjashtë muaj me radhë ka sjellë rreth 300 milionë euro humbje të drejtpërdrejta, rënie deri të të kapaciteteve prodhuese të ekonomisë, pezullim të kontratave ndërkombëtare të sipërmarrjes dhe largim të investitorëve të huaj. Ky është dëmi që komuniteti i biznesit në Kosovë vlerëson se i është shkaktuar ekonomisë së vendit përgjatë gjashtë muajve ngërç për tekat e politikës. Aleanca Kosovare e Bizneseve thotë se këto nuk janë vetëm statistika, por janë mijëra vende pune të humbura dhe dhjetëra biznese në prag të falimentimit. Bizneset kosovare dënojnë pasojat e rënda ekonomike që ka shkaktuar ngërçi. Sipas AKB-së, kjo krizë e qëllimshme politike ka paralizuar vendimmarrjen shtetërore, ka penguar funksionimin e institucioneve dhe ka shkaktuar humbje të mëdha në çdo sektor, nga prodhimi dhe eksporti, te investimet e huaja dhe projektet strategjike në vend.