Gjykata Themelore e Prizrenit ka urdhëruar një muaj paraburgim për 23 të dyshuar lidhur me dyshimet për manipulim të votave të zgjedhjeve të parakohshme parlamentare të dhjetorit. Ata dyshohen për një sërë veprash penale lidhur me zgjedhjet e 28 dhjetorit, përfshirë veprën penale kundër të drejtës së votimit, kanosjen, marrjen e ryshfetit dhe dhënien e ryshfetit, tha gjykata në një njoftim të dielën. Të dyshuarit, të arrestuar të premten gjatë një aksioni të gjerë në rajonin lindor të vendit, janë komisionerë dhe vëzhgues që kanë marrë pjesë në numërimin e votave. Sipas gjykatës, 21 nga 23 të dyshuarit, të identifikuar vetëm me iniciale, dyshohen për falsifikim të rezultatit të votimit. Një e dyshuar tjetër, dyshohet për falsifikim të rezultateve të votimit dhe marrje të ryshfetit ndërsa një vëzhgues dyshohet për kanosje dhe dhënie të ryshfetit. Vendimi ndaj tyre vjen pas një aksioni të gjerë që autoritetet kryen në Prizren të premten, ku arrestuan 109 të dyshuar për manipulim të votave të zgjedhjeve për Kuvendin e Kosovës. Javën e kaluar, Komisioni Qendror i Zgjedhjeve u detyrua ta nisë rinumërimin e plotë të votave, pasi kishte gjetur mospërputhje në votat për kandidatët për deputetë. Kur rinumërimi ka përfunduar në pothuajse gjysmën e vendvotimeve, rezulton se rreth 80 mijë vota janë të pasakta. Kryeprokurori i Prokurorisë Themelore në Prizren, Petrit Kryeziu, tha të premten se në mesin e të arrestuarve në Prizren kishte edhe familjarë të kandidatëve për deputetë. Sipas tij, një manipulim i tillë nuk ka mundur të ndodhë pa një kompromis mes komisionerëve të katër partive më të mëdha politike.