Helmimi i qindra qytetarëve në Deçan ka bërë që kjo komunë të shpallë gjendjen e jashtëzakonshme. Dyshimet e para zyrtare nga autoritetet për shkakun e helmimit janë te një degë e furnizimit të ujësjellësit “Hidrodrini”. Deri tani dy persona kanë humbur jetën, ndërsa numri i qytetarëve në spital ka shkuar në 884. Kryetari i Komunës të Deçanit, Bashkim Ramosaj më herët hodhi dyshime se kjo ngjarje mund të jetë e qëllimshme, ndërsa thotë se kjo është hera e dytë që brenda një muaji që ndodhin helmime. “Është hera e dytë brenda një muaji që po raportohet e njëjta skenë që na bën të mendojmë se ngjarja mund të jetë e qëllimshme. Prokuroria dhe hetuesit po merren me ngjarjen. Nëse analizat mikrobiologjike e nxjerrin ujin të dëmshëm, për personat përgjegjës do të ndërmerren masa ndëshkuese politike, ligjore e administrative”, tha ai. Ndërkaq Instituti Kombëtar i Shëndetit Publik (IKSHPK) deklaroi dje se nga gjashtë mostra të testuara të ujit, në dy prej tyre kanë gjetur koloni të dyshuara të baktereve. Megjithatë, drejtori i IKSHPK, Naser Ramadani, deklaron testimet duhet të vazhdohen të bëhen në laborator, duke shtuar se shkaku i saktë i këtij helmimi nuk është përcaktuar ende. Rastet e helmimit në këtë komunë filluan para dy ditësh, ku persona nga fshatrat Irzniq, Prilep e Lugu i Branit, kërkuan ndihmë në spital, pas shfaqjes së simptomave.