Qeveria ka shpallur zyrtarisht lumin Vjosa park kombëtar, duke i dhënë fund debatit në atë që është quajtur si lumi i fundit i egër në Europë. Në detajet e vendimit tregohet se zona e mbrojtur natyrore prek një sipërfaqe prej 12.7 mijë hektarësh, ku 47% janë sipërfaqe ujore, 36% sipërfaqe bregore, 9.5% sipërfaqe tokësore ndërsa pjesa e mbetur janë breza lumorë të prirur për t’u gërryer. Parku Kombëtar i Vjosës do të ndahet në dy nënzona. E para përfshin nënzonën qëndrore me sipërfaqe prej 11.8 mijë hektarësh është sipërfaqja ku do të zbatohet shkalla e parë e mbrojtjes pasi ka një biodiversitet të larmishëm dhe duhet të jetë e paprekur nga veprimtaria njerëzore për të ruajtur të gjitha karakteristikat e saj, ndërsa do të lejohen vetëm kërkimi shkencor dhe zhvillimi i veprimtarive ekoturistike të lira në natyrë. Pjesa tjetër që përbën 7% të sipërfaqes do të quhet nënzona e përdorimit tradicional dhe zhvillimit të qëndrueshëm. Kjo nënzonë përfshin tokat pyjore, bujqësore e kullotat dhe territore ujore, ku mundësohet vazhdimi i veprimtarive tradicionale si, punime për shëndetësimin e pyjeve, aktivitete bujqësore, kullotja, grumbullimi dhe kultivimi i bimëve mjekësore e aromatike. Në këtë sipërfaqe do të zbatohet shkalla e dytë e mbrojtjes dhe mund të lejohen ndërhyrje që duhet të miratohen nga Këshilli Kombëtar i Territorit, por pa prishur sistemin ekologjik. Plani i menaxhimit të Parkut Kombëtar dhe objektivat e ruajtjes së zonës do të hartohen nga Agjencia Kombëtare e Zonave të Mbrojtura,brenda dy vitesh nga data e hyrjes në fuqi të vendimit. Do të jetë kjo agjenci që do të menaxhojë parkun.