Autoritetet shëndetësore amerikane kanë vendosur të tregohen të kujdesshme e të zhvillojnë të tjera teste rreth vaksinës së Johnson & Johnson. Qendra për Kontrollin dhe Parandalimin e Sëmundjeve (CDC), do të shqyrtojë të gjitha njoftimet mbi disa raste të tjera me efekte të rënda anësore që ka mundësi të kenë lidhje me vaksinën amerikane me një dozë. Edhe pse rastet në fjalë nuk janë të shumta, ato sërish do të kalohen në lupën e ekspertëve të shëndetësisë. Më herët, Agjencia Evropiane e Barnave, (EMA), enti rregullator europian për ilaçet pohoi se kishte zbuluar një “lidhje të mundshme” mes vaksinës Johnson & Johnson dhe mpiksjeve jashtëzakonisht të rralla të gjakut. Por nga ana tjetër, specialistët e saj përsëritën se përfitimet nga vaksina i tejkalojnë rreziqet. Sipas EMA-s, tek etiketat e vaksinës duhet shtuar një paralajmërim për mpiksje gjaku, ashtu si për vaksinën e AstraZeneca-s dhe se këto çrregullime të rralla të gjakut duhet të konsiderohen si “efekte anësore shumë të rralla. BE-ja, e përballur me pengesa të shumta ne fushatën e vet të imunizimit për shkak të problemeve me AstraZenecan, të pezulluar apo kufizuar tashmë në disa vende, kishte varur shumë shpresa tek vaksina e Johnson and Johnson. EMA tha se të gjitha rastet e mpiksjeve kishin ndodhur tek të rriturit nën 60 vjeç, kryesisht gratë, brenda tre javësh nga vaksinimi.