Pas mbështetjes për anëtarësimin në NATO, Shtetet e Bashkuara të Amerikës po planifikojnë të sjellin armatime në Kosovë. Departamenti i Shtetit ka njoftuar Kongresin Amerikan për një leje të propozuar për eksportimin e artikujve të mbrojtjes, të dhënave teknike dhe shërbimeve të mbrojtjes drejt Kosovës. Burime brenda Kongresit bëjnë me dije për “Radio Evropa e Lirë” se armatimet që SHBA pritet të sjellë në Prishtinë do të jenë në vlerën e 14 milionë dollarëve ose më shumë. Njoftimi është dërguar nga Byroja për Çështje Legjislative e Departamentit amerikan të Shtetit, në përputhje me nenin 36(c) të Ligjit për Kontrollin e Eksportit të Armëve, dhe i është përcjellë Komitetit për Marrëdhënie me Jashtë të Senatit. Njoftimi për furnizimin me armatim të ri vjen në kohën kur kongresistë amerikanë po bëjnë thirrje që Uashingtoni të mbështesë anëtarësimin e Kosovës në NATO, duke shtuar presionin mbi vendet që nuk e kanë njohur ende, si Greqia, Rumania, Sllovakia dhe Spanja. Por, të enjten, përpjekja e kongresmenit republikan, Keith Self, për të kushtëzuar ndihmën ushtarake ndaj Greqisë, me qëllimin që të njohë Kosovën, nuk gjeti mbështetje në Komitetin për Punë të Jashtme të Dhomës së Përfaqësuesve, pasi disa kongresmenë argumentuan se çështja e Kosovës duhet të trajtohet veçmas dhe se projektligji për ndihmën ndaj Greqisë ka një bazë dypartiake të konsoliduar.