21 komuna kanë zgjedhur kryetarin për katër vjetët e ardhshme e 19 të tjera do shkojnë në votim më nëntë nëntor në raundin e dytë. Rezultatet preliminare të zgjedhjeve lokale të 12 tetorit nuk e nxorën asnjë fitues absolut. Nga numërimi i votave për kryetarë komunash, Lëvizja Vetëvendosje ka fituar pa balotazh në tri komuna: Shtime, Kamenicë e Podujevë. Në 12 të tjera shkon në balotazh, ku në dy prej tyre si parti e parë e në dhjetë si e dyta. Në tre komuna poashtu, edhe Partia Demokratike e Kosovës e mori fitorën në raundin e parë. Kandidatët e PDK-së triumfuan të dielën në Skënderaj, Ferizaj e Han të Elezit. Ndërkaq, kjo parti mbetet në garë në gjashtë komuna, ku në katër prej tyre është e para e në dy, e dyta. Lidhja Demokratike e Kosovës mori pa balotazh Istogun e Lipjanin, derisa vazhdon garën në nëntë komuna tjera. Në gjashtë prej tyre garon si parti e parë e në tre është e dyta. Aleanca për Ardhmërinë e Kosovës mori në raundin e parë vetëm Decanin, derisa më nëntë nëntor garon për pesë komuna, në katër prej të cilave është parti e parë e në Junik mbetet si parti e dytë. Nisma Socialdemokrate mori vetëm Malishëve duke e përmbyllur garën për nivelin lokal këtu. Në Mamushë, komunë kjo e banuar nga komuniteti turk fitoi kandidati i Partisë Demokratike Turke, e Lista Serbe mori pa balotazh 9 nga dhjetë komunat më shumicë serbe, ndërkaq vazhdon garën më nëntë nëntor në balotazh kundrejt Unitetit Kombëtar Serb. Nga procesimi i 97% të rezultateve për Kuvendet Komunale, Partia Demokratike e Kosovës del e para me 208 asamblistë në nivel vendi, pasohet nga Lidhja Demokratike e Kosovës me 199. Lëvizja Vetëvendosje renditet e treta me me 188 dhe AAK-ja mori 98. Ndërsa, të hënën pas orës 16:00 ka nisur numërimi i votave që do të bëhet në Qendrat Komunale të Numërimit në 38 komunat e vendit.