Autoriteti i Mediave Audiovizive ka hapur një dritare të re informuese në faqen e internetit të institucionit duke bërë transparencë mbi pronarët e medias audio dhe audiovizive në Shqipëri. Kështu AMA përmbush një prej detyrimeve të procesit të integrimit. Në një intervistë për Top Channel, kryetarja e AMA-s, Armela Krasniqi tregon se ky është një hap i mëtejshëm për rregullimin e tregut mediatik. “Procesi i transparencës së pronësisë së medias në fakt është një detyrim që ka ardhur pas direktivës së Bashkimit Europian. Tashmë ashtu si në institucionet homologe, në të njëjtën formë ndodh edhe në Shqipëri. Prej gjashtë muajsh ky proces në institucionin tonë është kryer. Të gjithë pronarët përfitues të mediave audio dhe audiovizive, janë të dhëna të administrueshme për publikun. Kemi transparencë të plotë, pra kemi sy për të parë deri në fund se kush investon para në media dhe kush përfiton nga ky aktivitet”. Procesi i transparencës së pronësisë së radiove, televizioneve, shërbimit kabllorë, iptv apo ott është në ndryshim të vazhdueshëm, pasi në rast lëvizjesh në strukturën e pronarëve, kërkesa shqyrtohet nga AMA dhe lista më pas përditësohet. “Është bërë një punë e rëndësishme, pasi janë koordinuar të gjithë të dhënat me Qendrën Kombëtare të Biznesit. Por nuk është ndalur vetëm këtu. Të gjithë subjekteve ju është kërkuar vetëdeklarimi dhe ka pasur një vullnet bashkëpunimi. Të gjithë i janë përgjigjur thirrjes së AMA-s për të bërë këtë transparencë”.