Ka përfunduar numërimi i votave të rregullta për zgjedhjet lokale të 12 tetorit në Kosovë, ndërsa për ditën e tretë me radhë në Qendrën e Numërimit dhe Rezultateve është duke vazhduar verifikimi i votave me postë. Komunat që e mbyllën të fundit procesin e numërimit dhe verifikimit të rezultateve ishin Prishtina, Prizreni, Gjilani dhe Malisheva. Komisioni Qendror i Zgjedhjeve sqaroi se aktualisht po vazhdon numërimi dhe verifikimi i votave nga jashtë dhe sipas të dhënave deri në paraditen e sotme ishin numëruar 54 kuti me fletëvotime për kryetarët e komunave dhe 45 të tjera për kuvendet komunale. Qytetarët që jetojnë jashtë Kosovës votuan përmes postës nga 17 shtatori deri më 11 tetor. Pas përfundimit të numërimit të këtyre fletëvotimeve, do të numërohen edhe votat me kusht dhe të personave me nevoja të veçanta dhe më pas KQZ-ja do të shpallë rezultatin për raundin e parë të zgjedhjeve lokale. Balotazhi është caktuar të mbahet në 9 nëntor. Rezultatet paraprake tregojnë se zgjedhja e kryetarëve është mbyllur që në raundin e parë në 21 komuna, ndërsa 17 të tjera shkojnë në balotazh. Në qytetet më të mëdha të Kosovës si në Prishtinë, Mitrovicë, Gjilan, Pejë dhe Gjakovë nuk kishte fitues kësaj radhe, por do të ketë një raund të dytë. Lista Serbe, e cila mori pjesë në këto zgjedhje me kandidatët e saj, ka fituar nëntë nga dhjetë komunat e banuara me shumicë serbe.