Ministria e Drejtësisë e Kosovës pohoi rrëzimin e kërkesës së Serbisë për informacione mbi sulmin e gati një viti më parë në Banjskë të Zvecanit, me arsyetimin se ajo bie ndesh me disa pika të Ligjit për bashkëpunim juridik ndërkombëtar, dhe në bazë të ligjeve të Kosovës, vetëm organet gjyqësore të Kosovës kanë juridiksion t'i gjykojnë çështjet që pretendohet se janë kryer brenda territorit të vendit. 24 shtatorin e vitit 2023 një grup serbësh të armatosur sulmuan në Banjskë policinë e Kosovës, duke vrarë efektivin Afrim Bunjakun. Gjatë shkëmbim zjarrit humbën jetën edhe tre agresorë serbë. Përgjegjësinë për sulmin e mori ish-nënkryetari i Listës Serbe, Millan Radoiçic, i cili besohet se po qëndreon në Serbi. Hetimet mbi ngjarjen e rëndë në Kosovë është duke i drejtuar Prokuroria Speciale, që pritet të dalë me një aktakuzë përpara vjeshtës. Por ndërkohë, Prokuroria e Lartë në Beograd është duke kryer verifikimet e saj dhe përmes Misionit të Bashkimit Evropian për Sundim të Ligjit, EULEX, kërkoi informacione nga autoritetet kosovare. Ministrisë së Drejtësisë kujtoi se Kosova nuk ka marrë asnjëherë përgjigje nga Serbia, në kërkesën e bërë në tetorin e vitit të kaluar, "për dorëzimin e kriminelëve në mënyrë që ata të dalin përpara drejtësisë në Republikën e Kosovës”, ndërsa ka bërë thirrje për hetim ndërkombëtar për “bazat e trajnimit të terroristëve në territorin e Serbisë, përfshirjen e Serbisë në financim dhe furnizim me armatim të terroristëve”.