Në ditës së dytë të dëshmisë për procesin në Hagë, Christopher Hill, ish i dërguari i posaçëm i SHBA-së gjatë luftës në Kosovë, foli dhe për takimet e Hashim Thaçit në Shqipëri. Ai u pyet nëse Thaçi kishte mbajtur takime me krerët e shtetit në Shqipëri gjatë kohës mes konferencës së Rambujesë dhe bisedimeve në Paris më 1999. “Në atë kohë nuk kisha dijeni, por më vonë kam mësuar se kishte shkuar në Shqipëri, por nuk mund ta them se kur kishte ndodhur. Shtetet e Bashkuara ishin në kontakt me Shqipërinë dhe e dinin se shteti shqiptar mbështeste procesin e Rambujesë”, u shpreh Hill. Edhe në ditën e dytë të dëshmisë, Christopher Hill foli për rolin e Hashim Thaçit gjatë luftës së viteve 1998-1999 në Kosovë, duke thënë se nuk besonte, dhe as nuk kishte dëgjuar që Thaçi të kishte urdhëruar në kohë të luftës aktivitete të paligjshme. Hill dëshmoi se nuk është i sigurt nëse Hashim Thaçi ka qenë një ndër themeluesit e Ushtrisë Çlirimtare të Kosovës. “Nuk e di nëse Hashim Thaci ka qenë njëri nga themeluesit e UÇK-së dhe fakti që unë nuk e kam hasur emrin e tij deri më vonë gjatë vitit, me sugjeron që ai nuk ka qenë”, tha Hill.