Mesditën e së enjtes në një lokal në qendër të Skënderajt janë përfshirë në një incident zyrtarë të Lëvizjes Vetëvendosje dhe Partisë Demokratike të Kosovës. Hysni Mehani, kryetar i degës së Vetëvendosjes në këtë komunë tha se u sulmua nga kryetari Sami Lushtaku. "Te dashur miq jam sulmuar nga Sami Lushtaku dhe banda e tij. Telefonin personal ma kanë marrë. Lus policinë të mbroj familjen time dhe ftoj familjarët për përmbajtje", njoftoi Mehani. Pak minuta pas njoftimit nga zyrtari i Vetëvendosjes u përgjigj Lushtaku i cili tha se u etiketua si "Sami Serbia" nga pushteti i Albin Kurtit dhe qytetarët reaguan. "Pushteti i Albin Kurtit përmes mekanizmave të tij tentoi që sot të më sulmoi në Skenderaj. E kam një jetë në shërbim të vendit kurse etiketat si "Sami Serbia" qytetarët nuk i tolerojnë më prandaj edhe reaguan", shkroi Lushtaku. Lëvizja Vetëvendosje dënoi sulmin, siç e quajtën ata banditesk e publikuan fotografi të Mehanit pas sulmit. E ish-deputetja e kësaj partie, Arjeta Fejza që ishte prezentë në momentin e incidentit, tha se sulmi ishte i paprovokuar. DEK Arjeta Fejza – ish-deputete, LVV Sot rreth mesditës unë bashkë me zëvendësministrin Mehani ishim duke pirë një kafe në një nga kafeteritë në qendër të Skënderajt edhe ishim duke diskutuar, domethënë fare të shpërqendruar në muhabetin tonë pa asnjë vëmendje rreth asaj se çka po ndodhte përreth edhe pa asnjë lloj komunikimi paraprak me zotëri Lushtakun. Ai u afrua dhe e sulmoi zëvendësministrin Mehani. Fillimisht me telefon, pastaj me dorë, pastaj edhe me gotë, siç keni pasur mundësinë me pa edhe dëmin, të cilin e ka në fytyrën e tij. Sulmin e ka dënuar edhe kryeministri në detyrë, Albin Kurti i cili është edhe kryetar i Vetëvendosjes. DEK Albin Kurti – Kryeministër në detyrë i Kosovës Qeveria e Kosovës e dënon këtë sulm qyqar e të papranueshëm që shpërfaqë mendësinë banditeske. Veprimet e tilla nuk na trembin e nuk na shtyjmë të tërhiqemi nga gara politike në asnjë qytet Në mbrojtje të Sami Lushtakut dolën nga organizata e Veteranëve të Luftës që thanë se “Të quash një gjeneral të UÇK-së “njeri i Serbisë”, ata që u rreshtuan për lirinë e Kosovës, është e ulët, e papranueshme dhe politikisht helmuese”. Partia Demokratike e Kosovës, pjesë e së cilës është Lushtaku nuk ka reaguar për sulmin, por në mbrojtje të tij kanë dalë disa prej bashkëpartiakëve.