Policia e Kosovës ka mbyllur tri degë të Postës së Serbisë në Mitrovicë të Veriut, tri në Leposaviq, dy në Zveçan dhe një në Zubin Potok. Bashkimi Evropian e quajti të njëanshëm dhe të pakoordinuar vendimin e autoriteteve të Kosovës për mbylljen e degëve të Postës së Serbisë, në veri të Kosovës. Sipas BE-së, një veprim i tillë shkel dialogun mes dy vendeve, që ndërmjetësohet nga Bashkimi Evropian. “Veprimet e njëanshme dhe të pakoordinuara nuk mund të ofrojnë zgjidhje për këtë dhe çështje tjera, që i përkasin procesit të normalizimit mes Kosovës dhe Serbisë. Mbyllja e shërbimeve ekzistuese për serbët e Kosovës, pa një marrëveshje të arritur paraprakisht, do të ndikojë negativisht në përditshmërinë dhe kushtet e jetesës së këtij komuniteti”, ka thënë blloku evropian përmes një deklarate. BE-ja i ka bërë thirrje Qeverisë së Kosovës që të rishqyrtojë këtë vendim dhe të gjejë një zgjidhje të negociuar në kuadër të dialogut. BE ka rikujtuar se në kuadër të marrëveshjeve të arritura për telekomunikacionin, më 2013 dhe 2015, dy palët kanë rënë dakord që për shërbimet postare të diskutohet “në një fazë të mëvonshme”, dhe kështu, sipas BE-së, është kuptuar që kjo çështje mund të adresohet vetëm përmes dialogut. Nga ana tjetër, zyrtarë të policisë së Kosovës thanë se e nisën aksionin pasi kishin informacione nga Autoriteti Rregullativ se në territorin e Kosovës po vepronin operatorë ekonomikë pa licencë dhe që nuk janë të regjistruar.