Fiks Fare denoncoi mbrëmjen e së mërkurës një skandal në Tiranë, ku dy inspektorë të IMT-së, i kërkojnë një ryshfet prej 4 milionë lekësh të vjetra një qytetari. Në redaksinë e emisionit investigativ u ankua Ilir Haxhillari, i cili ka një dyqan te rruga “Siri Kodra” në Tiranë. Në vitin 2019 ai ka aplikuar në Bashkinë e Tiranës për hapësirë pronë publike, të hapësirës para dyqanit. Ka marr lejen dhe ka bërë me konstruksion metalik siç është. Ai regon se ka bërë një gabim se në leje xhami ishte 1.2 metra, kurse Iliri e bëri të gjithë faqen me xham. Në vitin 2023 në dyqan i shkojnë dy inspektorë, e pyesin për letrat dhe nuk i thonë asgjë. Ndërkohë, disa muaj më vonë i shkon një letër në dyqan nga përmbarimi për një detyrim që i kishte IMT-së. Masa ishte me gjobë, në asnjë vend nuk përmendej prishje. Pasi ka vijuar punën normalisht në janar të 2025 i shkojnë sërish dy persona nga IMT . "Më kanë kërkuar ryshfet 400.000 lekë të reja që të mos prishet objekti” thotë qytetari, teksa shton se në atë datë të dy personat nuk iu prezantuan me emër. Çdo gjë është e filmuar nga kamerat e biznesit. Por, disa ditë më pas, në datën 2 shkurt 2025, dy inspektorët i shkojnë sërish në dyqan me një vendim prishjeje.Të nesërmen i erdhën disa inspektorë, madje edhe dy të parët me të cilët debatoi dhe i akuzoi se i kërkuan ryshfet. Vendimi i IMT-së u shty për një afat të pacaktuar, teksa tashmë Iliri iu drejtua Gjykatës Administrative ku dhe ka fituar një gjyq për pezullim të veprimeve të IMT-së.