Fiks Fare denoncoi procesin e rindërtimit të shtëpive të të pastrehëve që iu shkatërruan shtëpitë nga tërmeti i 26 nëntorit i vitit 2019. Në përvjetorin e katërt nga kjo tragjedi, viktimat sa vijnë edhe shtohen. Genci Spaho u aksidentua në punë në maj 2022. Ai po punonte te firma “Kaca One” në zonën e Spitallës në Durrës. Në datën 7 maj, kur ndodhi aksidenti, punëtori nuk ishte i siguruar. Pronarët e firmës e siguruan ditën e aksidentit, teksa jepte shpirt në spital. Nga maji 2022 deri në nëntor 2023, prokuroria nuk ka vepruar. Sigurimet, Inspektoriati i Punës dhe Tatimet pranojnë direkt dhe indirekt se viktima ka qenë i pasiguruar. Në redaksinë e emisionit investigativ u ankua Denada Spaho, studente 22 vjeçare, vajza e viktimës. Ajo tregon se babai sapo kishte filluar punën dhe ra në gropën e ashensorit, e cila minimalisht duhet të ishte e mbuluar për mbrojtjen e jetës së punëtorëve. Nuk ishte i siguruar, madje kartën e identitetit të tij ia kishin marrë të ëmës ditën që ndodhi ngjarja në spital. Këtë e vërteton edhe fleta e dhënë nga Inspektoriati i Punës ku rezulton se data e deklarimit të të ndjerit është 7 maji 2022, pra data e aksidentit.