Edhe pse sipas ligjit të sistemit parauniversitar shkollat janë të depolitizuara, të premten deputeti i PS Ervin Bushati ka publikuar në rrjetet sociale, gjithashtu edhe shkolla 9 vjecare Misto Mame, një aktivitet të zhvilluar brenda këtij institucioni arsimor me nxënësit edhe mësuesit. Mësuesja që ka dalë në foto në krahun e majtë të deputetit të veshur me siglën e PS, refuzoi të përgjigjet, ndërsa drejtoresha nuk u paraqit edhe pse Top Channel kërkoi reagim. “Më kanë dhënë urdhër të mos futeni”, shprehet roja e shkollës. Organizata Qëndresa Qytetare e ka kallëzuar rastin në KQZ, duke kërkuar që t’i tërhiqet vëmendje subjektit politik që kjo ngjarje të mos përsëritet, ndërsa thekson se fajtor është edhe drejtuesi i shkollës që ka lejuar zhvillimin e aktivitetit. “Për shkak se ky është në kundërshtim me nenin 91 të kodit zgjedhor ku ndalohet përdorimi i ambjenteve shkollore, nxënësve dhe administratës së saj. Organizimi i nxënësve të sistemit parauniversitar në shkolla, dënohet edhe sipas kodit penal nga 6 muaj deri në 3 vite burgim. Sanksioni duhet të shkoj për drejtuesin e shkollës apo punonjësit e tjerë të cilët ia kanë krijuar mjedisin deputetit të subjektit elektoral”.