Rreth 50 farmacistë rrezikojnë të humbasin kreditet e detyrueshme të edukimit në vazhdim dhe të detyrohen t’i nënshtrohen provimit të shtetit, pasi një trajnim katërditor i organizuar nga Shoqata Maya në fund të vitit 2025 nuk është akredituar nga institucionet përgjegjëse. Pjesëmarrësit prisnin të përfitonin 18 kredite, por pas gjashtë muajsh ato nuk janë reflektuar në sistem. Urdhri i Farmacistit konfirmon se aktiviteti nuk është njohur nga agjencia përkatëse dhe se organizatorët kanë qenë në dijeni të vendimit. Nga ana tjetër, Shoqata Maya shprehet se ka pasur paqartësi dhe vonesa në komunikimin institucional. Pas interesimit të medias, shoqata njoftoi se aktiviteti do të përsëritet, por kreditet e reja do të llogariten për vitin 2026 dhe jo për vitin 2025, duke lënë të pazgjidhur problemin e farmacistëve për vitin e kaluar.