Gjimnazi “Sami Frashëri” në Tiranë, ka rreth 480 maturantë. Ersa Fera është një prej tyre. Drejton njëkohësisht edhe qeverinë e nxënësve. “Duke qenë se jemi një maturë “fatkeqe”, do të thosha, sërish jam shumë e motivuar, që këtë vit të dal me rezultatet më të mira të mundshme. Kemi kaluar peripeci të njëpasnjëshme, tërmeti dhe pandemia, për më tepër që gjimnazi ynë përjetoi edhe shembjen e godinës. Provimet e maturës nisin më 3 qershor dhe përfundojnë në 15 qershor, me lëndën me zgjedhje. Unë si lëndë me zgjedhje kam Ekonominë, që ka edhe përqindjen më të lartë në gjimnazin “Sami Frashëri” si lënde me zgjedhje. Konsultimet për maturën kanë nisur që në janar të këtij viti. Që nga 11 shkurti kur kaluam në sistem online edhe konsultimet I zhvillonim në platformat Akademi dhe Zoom. Tani që ne maturat jemi kthyer fizikisht në shkollë, konsultimet kryhen nga ora 13.00 deri në 14.00, kur ne fillojmë mësimin në shkollë. Pa konsultime unë mendoj, se nuk do të jemi kurrsesi gati për të përballuar provimet e maturës, të cilat, sidoqoftë, shpresoj të jenë të arsyeshme për një brez si ne. Kurse private unë personalisht nuk ndjek. Nuk e kam parë të nevojshme.