Fiks Fare denoncoi mbrëmjen e së hënës një skandal në fshatin Ninesh në Mallakastër, ku eshtra njerëzore kishin dalë në sipërfaqe. Në Njësinë Fratar të Mallakastrës, prej rreth 3-4 vitesh në rrugën sipër këtij fshati kanë dalë eshtrat e një varri të vjetër. Banorët thonë se asnjë institucion s’i ka parë, teksa shtojnë se edhe fëmijët nuk i lënë të kalojnë në atë rrugë. Sipas tyre, rruga është shtruar rreth 20 vite më parë me kalldrëm dhe lidh fshatin me kodrat përreth si dhe me një fshat në Memaliaj. Sipas tyre, në atë kohë erdhën mjete të rënda dhe zgjeruan rrugën ekzistuese. Më pas, nga shirat që kanë rënë, në skarpatën e një ane të rruge dolën eshtrat e një trupi të varrosur. Pas interesimit të Fiks Fare u vunë në lëvizje institucionet të cilat po bëjnë të mundur rrethimin dhe rehabilitimin e vendit.