Banorët e lagjes 'Kapanone', në Gjadër të Lezhës, kanë denoncuar përmes emisionit “Fiks Fare” gjendjen e rënduar të rrjetit elektrik në zonën e tyre. Sipas tyre, linja që furnizon rreth 70 familje është instaluar para 20 vitesh dhe është amortizuar, duke shkaktuar dëme të shumta materiale dhe rrezik për jetën e tyre. Banorët tregojnë se telat përcjellës kanë marrë flakë disa herë, ndërsa tre vite më parë si pasojë e rrjeti të amortizuar u dogjën e tre banesa. Për shkak të tensionit të ulët dhe furnizimit të dobët, shumë pajisje elektro-shtëpiake janë dëmtuar. Fiksi kontaktoi me OSHEE-në e cila pohoi se rrjeti është shumë i amortizuar dhe se është hartuar një projekt për rikonstruksionin e rrjetit dhe është dërguar për miratim pranë Drejtorisë Rajonale të Shkodrës. Pas miratimit të kërkesës për bazën materiale, do të nisë vendosja e shtyllave të reja dhe instalimi i kabllove të standardit “ABC”, që sigurojnë një furnizim më cilësor dhe të sigurt.