Në datën 20 shtator 2022, Fiks Fare, transmetoi rrëfimin e një 26 vjeçari, i cili tregonte me detaje mënyrën si ishte rekrutuar nga një grup kriminal për te bërë disa vepra penale në qytetin e Lushnjes. I riu tregoi me detaje mënyrën si do gjymtonte një person. Ai tha se për rrahjen do të paguhej 3 mijë euro, ndërkohë nëse objektivi do të pësonte thyerje kockash do të paguhej më shumë. Madje, porositësit i kishin kërkuar që objektivit t’i digjej edhe automjeti, ndërsa pagesa do të shtohej. Por, megjithëse i riu bashkëpunoi me policinë, duke treguar ndërmjetësin, porositësin dhe objektivin, ai sërish është lënë “në mes të 4 rrugëve”, pasi policia nuk ka bërë asnjë veprim. Në redaksinë e emisionit "Fiks Fare" mbërriti një tjetër telefonatë, kësaj herë nga bashkëshortja e objektivit. "Ju falënderojmë, na keni shpëtuar jetën. Nuk kemi pasur asnjë dijeni se çfarë po na ndodhte" ishte telefonata. Zonja në fjalë kishte dyshime tepër të mëdha për Policinë e Lushnjes dhe kërkon mbrojtje për vete dhe familjen.