Eno Kadillari 32 vjeç, djali i madh i familjes Kadillari, ka kërkuar ndihmën e emisionit Fiks Fare, pasi prej disa ditësh ai dhe familja e tij nuk kanë një strehë ku mund të jetojnë. Nga pamundësia për të paguar qiranë i zoti i shtëpisë nuk i lejon më të jetojnë aty. Eno thotë se këtë problem e kanë patur gjithmonë, por në kohën që babai i tij ishte në jetë, pagesën e qirasë në pjesën më të madhe të kohës e mbulonte ai, por që prej dy javësh ai nuk jeton më. Eno tregon se tani ka mbetur vetëm me vëllain 28 vjeç dhe nënën e tij. Të tre anëtarët marrin mjekim, pasi vuajnë nga probleme të shëndetit mendor. Eno gjithashtu tregon se i vëllai është përdorues i substancave narkotike dhe shfaq herë pas here shenja agresiviteti. Me lot në sy ai kërkon ndihmën e Fiksit vetëm për t'i siguruar një strehë ku mund të fusim kokën.