Rënia masive shkëmbore nga mali, prej më shumë se 15 ditësh ka bllokuar aksin e vjetër rrugor Milot-Rubik. Po ashtu, një problematikë tepër e madhe është edhe gërryerja nga lumi mat në disa pjesë të kësaj rruge. Rruga është kthyer në një rrezik serioz për lëvizjen e automjeteve. Kjo situatë e krijuar ka ardhur nga gërryerja e lumit Mat, duke bërë këtë rrugë në disa vende një kalimshe. Të vetmit sinjalizues që të tregojnë që ka shembje janë disa gurë të vendosur nga vetë banorët e zonës. Rreziku për të përfunduar në lumë është i madh, kryesisht për drejtuesit e mjeteve të cilët nuk e njohin problematikën e kësaj rruge. Në hyrje të këtij segmenti rrugor, pranë Urës me harqe, është vendosur një tabelë që tregon se kanë nisur punimet për stabilizimin e rrëshqitjeve, por në rrugë nuk shihet asnjë makineri apo punonjës. Bllokimi i rrugës ka krijuar vështirësi në lëvizje për banorët e fshatrave përreth Rubikut të cilët duhet të qarkullojnë nga rruga e kombit për të lëvizur drejt Rrëshenit, Lezhës e Tiranës një distancë mjaft e largët.