Tregu i shitjeve online është rritur, por rritja ka qenë në mënyrë jo të organizuar dhe kaotike. Kjo sjell konfuzion si te klienti, edhe tek ofruesit e shërbimeve, sepse çdo ditë hapen dhe mbyllen faqe të reja jo serioze që pretendojnë të fitojnë shpejt me këtë biznes. Informaliteti dhe përdorimi i lartë i cash-it mbeten problematikat kryesore. Thuajse mbi 90% e shitjeve online bëhen me para në dorë. Aktorët kryesorë të tregut presin që ecuria të vijojë pozitive. Së pari, ata i mbështesin shitjet e tyre te klientët e grupmoshës 17-35 vjeç dhe i shikojnë si target-grup të cilët i rikthehen përvojës së tyre me blerjet online. Së dyti, me zhvillimin e teknologjisë dhe rritjen e përdorimit të smartphone-ve, konsumatorët janë të prirur gjithnjë e më shumë drejt kësaj sjellje konsumatore.