Bashkëpunimi ushtarak mes shteteve është një normë në arkitekturën moderne të sigurisë, por në Ballkan, ai vazhdon të shihet si problem. të paktën nga Serbia kur përfshin Kosovën dhe dy aleatët e NATO-s, Shqipërinë dhe Kroacinë, shkruan REL. Narrativa shkon deri në perceptim të rrezikut, që jo domosdoshmërisht reflekton gjendjen reale të sigurisë në terren. Pikënisje e gjithë kësaj dinamike ishte një deklaratë për bashkëpunim në fushën e mbrojtjes dhe të sigurisë mes Prishtinës, Tiranës dhe Zagrebit, e nënshkruar më shumë se një vit më parë. Nënshkruesit e paraqitën atë si angazhim për forcimin e bashkëpunimit, mbrojtjen e territoreve dhe kontributin në paqe e siguri ndërkombëtare, duke theksuar se nuk është e drejtuar kundër askujt. Megjithatë, Serbia e interpretoi si një provokim që rrezikon integritetin territorial dhe sigurinë e qytetarëve deri në atë pikë sa presidenti Aleksandar Vuçiç deklaroi se këto vende po përgatiten për sulm. “Në mes të asgjësë shfaqet një aleancë ushtarake mes Prishtinës, Tiranës dhe Zagrebit. Jo një bashkëpunim ushtarak-teknik, jo një bashkëpunim ushtarak-ekonomik, por një aleancë ushtarake. Dhe, natyrisht, jam i frikësuar për çdo qytetar të këtij vendi”, tha Vuçiç. Për ta forcuar këtë narrativë, ai paralajmëroi javën e kaluar investime të reja në ushtri dhe rritje të mëtejshme të kapaciteteve mbrojtëse, duke theksuar se Serbia duhet të jetë e përgatitur për çdo zhvillim në një “situatë komplekse” sigurie, të shkaktuar nga aktivitetet e Prishtinës, Tiranës dhe Zagrebit.