“Ky është një shans që të fillojmë të shërohemi si shoqëri, t’i ndëshkojmë ata që janë përgjegjës dhe të përpiqemi të jetojmë si gjithë bota normale”, thotë për Radion Evropa e Lirë Dushan Spasojeviq, profesor në Fakultetin e Shkencave Politike në Beograd. Pas fitores së Listës Studentore në zgjedhjet e parakohshme parlamentare në Serbi, Spasojeviq e cilëson rezultatin si një fitore të madhe dhe deri diku të papritur, si dhe një humbje shumë të rëndë për Partinë Përparimtare Serbe. “Ky rezultat bindës është një befasi, bashkë me faktin që askush tjetër nuk e kaloi pragun zgjedhor, çka konfirmoi se kjo ishte një betejë mes dy listave të mëdha”, tha ai. Politologu Dushan Spasojeviç e sheh menaxhimin e pritjeve si një ndër sfidat më të mëdha për pushtetin e ri. “Por, mendoj se do të ishte jashtëzakonisht e rëndësishme t’i ulim pritshmëritë dhe të mos besojmë se që të premten e ardhshme Serbia do të jetë shtet i së drejtës dhe se të gjithë ata që e meritojnë do të jenë në burg”, tha ai. Sipas Spasojeviqit, humbja e Partisë Përparimtare Serbe dhe e kandidatit të saj për kryeministër, Aleksandar Vuçiq, ishte aq e thellë sa u detyruan ta pranonin. I pyetur nëse zgjedhjet e parakohshme parlamentare u zhvilluan në një atmosferë referendumi, Spasojeviq tha se kjo mund të thuhet pa asnjë dyshim. “Vuçiq u përpoq t’i jepte fund krizës duke shpallur zgjedhje të parakohshme, por nuk ia doli. Nuk mundi ta përmbyste atë prirje”, tha ai. Spasojeviq tha se Partia Përparimtare serbe kontrollonte gjithçka deri para dy vjetësh, kur ndodhi tragjedia në Novi Sad. “Reagimi i tyre ndaj saj dhe dëshira që askush prej tyre të mos mbante përgjegjësi për asgjë çuan deri këtu. Sikur ndonjë ministër të kishte përfunduar në burg, sikur dikush të ishte arrestuar, nuk do t’i shihnim këto skena, e sigurisht jo në këtë mënyrë”, vlerësoi ai.