Raportuesja për Kosovën në Parlamentin Evropian, Viola von Cramon, ka thënë të martën se shpreson që në një të ardhme të shohë qëndrime më pak të polarizuara brenda Bashkimit Evropian, për çështjen e liberalizimit të vizave për Kosovën, sidomos në Francë. Ajo e ka quajtur për të ardhur keq dhe të gabuar vendimin e Francës për mosdhënie të dritës së gjelbër për këtë proces, as në vizitën e fundit që ka pasur kryeministri i Kosovës Albin Kurti në Paris. Sipas saj, Kosova ka plotësuar të gjitha kushtet për liberalizim vizash dhe BE nuk ka kryer detyrat e veta, dhe në këtë mënyrë po humb kredibilitetin. “Kjo gjë është me të vërtetë diskriminuese”, ka thënë ajo mes të tjerash. Megjithatë, von Cramon, tha se Kosova duhet të bëjë më shumë përsa i përket korrupsionit dhe reformave, në mënyrë që Qeveria franceze të bindë më lehtë publikun e vet për këtë temë. E pyetur nëse ka mundësi që procesi i liberalizimit të vizave të lidhet me dialogun Kosovë-Serbi, ajo tha se nuk ka dijeni për diçka të tillë, pasi, të paktën në të kaluarën, këto çështje nuk kanë qenë të lidhura me njëra-tjetrën. Franca është një ndër shtetet më skeptike sa i takon heqjes së regjimit të vizave për shtetasit e Kosovës. Pas takimit me presidentin francez, Emmanuel Macron, më 23 qeshor, kryeministri Albin Kurti tha se Franca nuk ka ndërruar qëndrim sa i takon liberalizimit të vizave për Kosovën. “Unë jam i bindur që ata e kanë marrë mesazhin tonë, mirëpo nuk ka zotim nga ana e tyre që do të ketë heqje të regjimit të vizave”, ka deklaruar kryeministri Kurti për televizionin publik të Kosovës po atë ditë. Mes të tjerave, kryeministri Kurti ka thënë se duhet punuar me Holandën dhe shtetet e tjera që janë skeptike për këtë proces. Kosovës i është premtuar liberalizimi i vizave që nga viti 2011. Tre vjet më parë, Komisioni Evropian ka rekomanduar heqjen e regjimit të vizave për Kosovën. Liberalizimi është votuar edhe në Parlamentin Evropian, por vendimi final ka mbetur te Këshilli i Ministrave të BE-së.