Një aksion 15 ditor inspektimesh do të zhvillohet në të territorin e Kosovës, veçanërisht në sektorin e ndërtimtarisë. Vendimi është bërë I ditur nga ministri për Punë, Familje dhe Vlerat e Luftës Çlirimtare, Andin Hoti. Sipas vendimit, Inspektorati Qendror i Punës do të hartojë një plan emergjent dhe të fillojë menjëherë një aksion kombëtar të inspektimeve. Ky aksion do të zhvillohet me fokus në kantieret ndërtimore dhe aktivitetet me rrezik të lartë. Inspektimet do të realizohen në mënyrë intensive, përfshirë edhe gjatë ditëve të festave dhe jashtë orarit të rregullt të punës. Në rastet kur konstatohet mosrespektimi i masave bazike të sigurisë dhe shëndetit në punë, subjektet do të përballen me ndalim të menjëhershëm të aktivitetit, vendosje të shenjave bllokuese, si dhe masa ndëshkuese sipas legjislacionit në fuqi. Gjithashtu sipas vendimit, parashikohen procedura për pezullim të përkohshëm të veprimtarisë dhe masa të tjera ligjore, deri në përmbushjen e kërkesave të rekomanduara.