Minierat në Bulqizë janë kthyer në burim rreziku për jetën të vazhdueshëm për punonjësit e galerive të firmave private, kjo pasi vetëm në harkun kohor të dekadës së fundit kanë qenë të shumta rastet, që kanë rezultuar në fatalitet për minatorët. Ngjarja më e fundit, si pasojë e të cilës humbi jetën i riu 27 vjeçar, Elti Alla ka vënë përpara përgjegjësisë tre shtetas. Burimet zyrtare bëjnë me dije se është arrestuar në flagrancë tekniku i minierës, një 34 vjeçar, banues në Bulqizë. Mbi të është ngritur akuza ‘Shkelje të rregullave të mbrojtjes në punë’. Ndërkohë ka filluar procedimi penal për dy shtetas të tjerë me detyrë brigadier në galerinë, që i mori jetën Elti Allës, djali I vetëm i familjes. Mësohet se tre punonjësit e minierës, nuk kanë bërë kontrollin teknik të frontit të punës dhe për pasojë është rrëzuar katrorja, e cila shërben për mbajtjen e tavanit të galerisë. Në këtë menyrë një masiv gurësh ka rënë mbi trupin e 27 vjeçarit duke i shkaktuar atij vdekjen e menjëhershme. Ndërsa hetimi për zbardhjen e plotë të ngjarjes po vijon në prokurorinë e Dibërs për të kryer veprimet e nevojshme, kjo ngjarje që pason edhe raste të tjera humbjes së jetes në minierë, rikthen në fokus debatet për sigurinë e minatorëve në punë.