Shtetet e Bashkuara të Amerikës vijojnë mbështetjen për SPAK. E Ngarkuara me Punë, Nancy VanHorn, u ndal këtë të enjte në godinën e Prokurorisë së Posaçme Antikorrupsion ku u takua sërish me Kryeprokurorin Altin Dumani. Ajo vlerësoi arritjet e SPAK-ut në ndjekjen penale të korrupsionit dhe krimit të organizuar në nivelet më të larta. Takimi mes tyre zgjati rreth një orë ndërsa e gjithë biseda u fokusua tek sundimi I ligjit, një element kyç ky për integrimin e vendit në Bashkimin Evropian. “Zj. VanHorn dhe Z. Dumani diskutuan se si SPAK dhe BKH nuk mund ta kryejnë këtë punë vetëm dhe duhet të mbështeten tek institucione si policia, gjykatat, zyrat e prokurorisë, zyrat e vetting-ut, inspektoratet dhe këshillat që bëjnë pjesën e tyre me pavarësi, përkushtim dhe integritet. Kjo është thelbësore për të mbrojtur përparimin që Shqipëria ka bërë në sundimin e ligjit, një element kyç i procesit të integrimit në BE.”, shkroi në Facebook ambasada amerikane. Takimi erdhi pas hapjes së grup kapitujve të parë nga BE.